Barnahópar
 

    

 

Vinna með börn sem glíma við lífið.

 

Markmið verkefnis:

-          Aðstoða börn í vanda og foreldra þeirra við að takast betur á við lífið með því að nota markvissa hugleiðslu, orkulosun, tilfinningavinnu, sjálfsstyrkingu, hópstuðning og áhugasviðsstyrkingu.

-          Börn og foreldar geti betur tekist á við verkefni daglegs lífs með þeim aðferðum sem kenndar verða.

Lýsing á verkefninu, greining á nýnæmi þess og áætlaður árangur (afurð):

 

Hugmyndin er að bjóða upp á námskeið fyrir börn í vanda og foreldra þeirra sem stæði í u.þ.b. 4 mánuði. Hópurinn myndi hittast einu sinni til tvisvar í viku í ca. 2 klst í senn.

 

Í hverjum hópi yrðu að hámarki 6 börn og foreldrar þeirra.  Byrjað yrði með einn hóp til tilraunar og að því loknu yrði metin reynslan af námskeiðinu og foreldrar og börn beðin um að gefa umsögn um það. Niðurstaðan yrði notuð til að endurmeta aðferðir og bæta þær fyrir næsta hóp.

 

Markhópurinn yrðu börn með ofvirkni og/eða athyglisbrest, börn með lélega sjálfsmynd, ofurviðkvæm börn og börn sem eru andlega næm, þau sem skynja fleira en aðrir sjá.

 

Aðferðir sem notaðar verða eru:

 

Markviss hugleiðsla til að róa, efla og styrkja sjálfsmynd og sköpunarkraft barnanna. Skapað verður kyrrlátt andrúmsloft með slökun og hugleiðslu til að tengjast börnunum og efla traust þeirra. Börnin verða hvött til að tjá sig og reynt verður að finna áhugasvið hvers og eins. Í framhaldinu yrði hópnum hugsanlega skipt upp í smærri einingar eftir áhugasviðum þegar það á við.

 

Lögð verður höfuðáhersla á að efla jákvæða ímynd hvers og eins og nota hrós sem örvun fyrir hvert jákvætt skref. Að baki liggur sú hugmyndafræði að hver manneskja búi bæði yfir jákvæðum og neikvæðum eiginleikum. Hjá börnum með vanda s.s. ofvirkni eða ofurnæmni einblínir umhverfið alltof oft á neikvæða eiginleika þeirra og hegðun. Við það skapast oft mjög neikvæð orka í öllu umhverfi barnsins og smám saman brýtur hún niður sjálfsmynd þess og leiðir gjarnan til neikvæðari hegðunar og erfiðra samskipta innan sem utan fjölskyldunnar. Markvisst verður unnið að því að breyta þessari neikvæðu orku í jákvæða í umhverfi barnsins.

 

Einnig verða notaðar aðferðir til orkulosunar s.s. dans, break dans, vinna með tónlist, leiklist, yoga og útihreyfingu.

 

Foreldrarnir munu taka þátt í starfinu og að hluta til munu foreldrar og börn vinna saman. Lögð verður áhersla á að nota markvissa hugleiðslu, orkulosun og tilfinningavinnu og að leiðbeina og efla foreldrana til þess að þeir geti haldið áfram á sömu nótum að námskeiðinu loknu. 

 

Friðbjörg Óskarsdóttir Valgerður Ólafsdóttir